.. و انا نلوّج عالالهام .. بعد عشرة سنين خدمة في تمكين المراة لازم نكتب حاجة غير كل الناس حاجة توري قداشني ممّنة بالقضيّة و قداش نحب نعطي.. جيت باش نهز راسي الفوق باش يهبط عليا الوحي ..نغمض عيني .. ياخي طلع الوحي مقابلني و انا ما في باليش.. مراة كبيرة قلّيلة تهز في ساشي كحلة رزينة فوق ظهرها و تتكركب ماشية واحدة واحدة.. غاضتني !!! يا ناري ما عندهاش شكون يهز معاها!!! و علاش دبشها مسخين هكّاكة؟! زعمة وحدانية نكرو فيها اهلها والا ما تجيبش صغار و لا صغارها مشاو و خلاوها و راجلها كانو حي راو مسيكن كيفها منين جاه الجهد.. برشا تخمام .. ميات فكرة جاتني وانا نرا فيها تعمل فاكا الخطوتين بالسيف و طول حطيت روحي في بلاسطها .. حسيتها ... اما قلت حتى كان ما جبتش صغار و هرب عليا الرّاجل و الامّالي و الاصحاب و الفان .. باقي عندي مخي واش حصّلت بخدمتي و قرايتي .. باهي والصحة ؟؟ زعمة الكبر يتّمن ..وانا ضايعة ، ما بين يا ربي علاش.. و قداشها خايبة الدنيا و قداش الزمن دوار...و هي ماشية واحدة واحدة والدنيا دايرة بيها تنقزو أطنطن، مش عاطيتها حتى فرصة، قالتلها مزروبة مانجمش نستناك...
شردت و رجعت .. غزرت .. نلوّج عليها .. وين مشات.. أنا ريتها و دمعتي طاحت.. ما عندها وين مشات. في وسط الزبلة تفرت تلوّج على حاجة منعرفش شنوة ... مش دبابز بلاستيك , ما فهمتش شنوة.. كل مرة تحل ساشي تفرت درا شنوة تحط عندها و ترجع تفرت .. هي تجبد و ساشيات يطيحوعليها فوق بعضهم بالذبان و الوسخ .. من كثرة ما سرحت فيها مالحقتش نرا اش تلوج.. وجهها و الفولارة بتقريطة لتالي هابطة على جبينها .و يدها اخشن من يد عشرة رجال و مخبشة .. نشوف فيها و نخمم شنوة نجم نعمل .. عشرة عشرين.. ميا ميتين.. مليون اثنين .. زعمة يضمنو العيد الجاي الوقت هذا نلقاها متكية على بنك لوح و تتفرج في عبد الرّزاق ولا مهند كيما ماماتي.. و الا قاعدة على جراية .. تحضر في كانون تاي و منها تتدفى كي خالتي حبيبة في سيدي بوزيد
رجعت نلوج عليها ، نتبع فيها.. جات تقص في الكياس .. دخلت بعضها .. الكرهب يزمرو.. مزروبين باش يفطرو اولادهم قبل مايرجعوهم للكونسرفاتوار.. والي عندو برنامج سهرية يعجلوش يروح يدوش يرتاح شوية و يعاود يخرج .. لازم نهبط نجيب سندوتشات مطيبطش فطور اليوم ..في وسط الجوجمة أدعثرت ... باش نهبط نعاونها عالقليلة نعديها الكياس، ملحقتش ... ما سكرت شبابك الكرهبة و خبيت الساك والتلفون عالسرقة و الخطفة ، إلا ما خالتي عيدية دارت الدورة.. و غابت عليا
اش عندي نكتب احتفالا بحقوق المراة، نكتب يا خالتي عيدية راني شفتك و نخمم فيك؟! و الا نكتب اش عندي نعمل والخالات عمال يكثرو و الجهد على قدو؟!
.. شنوا تعمل قطرة في بحر كبير .. زعمة نجمو نفرغو بحر بنظام قطرة قطرة ؟؟ على قد ما غلبتني الغصة و جابتلي وجيعة ، على قد ما السخانة في راسي طلعت ... باقي نقول مالازمش نسلمو... علاش ؟؟ على خاطر نحبك يا خالتي عيدية، حتى كان انت متعرفنيش و في بالك الي انا و برشا غيري كيف برشا عباد دايرين بيك ، لا من تلفتلك و لا من قلبو عليك... ماناش بش نسلمو يا خالتي عيدية